❊ الـــــــــــمـــــــــــــذاكـــــــــــرة ❊

وأخيرًا قربنا -في مصر ومعظم الدول العربية- من الامتحانات وطبعًا يوم الامتحان يكرم المرء أو يهان وهي المقولة اللي بتعمل ضغط عصبي على الناس ولا حول ولا قوة إلا بالله والناس أصلًا مش ناقصة ضغط كفاية المشاكل اللي هي فيها.

المهم حبيت في آخر موضوع ليا أكتبه في مدونتي المتواضعة تكون مساعد لينا كلنا عشان نقدر ننجح بإذن الله بإني أضع نصائح المذاكرة وكيفية المذاكرة الصحيحة قبل الامتحانات عشان ننظم نفسنا شوية ونشيل القلق والتوتر الحاصل قبل فترة الامتحانات ده وخصوصًا الغلابة اللي في ثانوية عامة ربنا معاكم يا حبايبي هههههههههههه بجد تصعبوا علي الواحد يعني بس ربنا يوفقكم للي إنتوا عايزينه لو فيه خير.

نصائحي لكم المجمعة طبعًا من مواقع خارجية:-

١-دعاء الاستذكار طبعًا وهو  اللهم لا سهل إلا ما جعلته سهلاً وأنت تجعل الحَزَنَ إذا شئت سهلاً.

٢-لا تذاكر بجانب مكان نومك.

٣-لا تكثر من شرب المنبهات واجتهد قدر استطاعتك.

٤-النوم لفترة كافية (لا يقل عن سبع ساعات) أيام الامتحانات.

٥-الحفاظ على المذاكرة فترة الصباح من بعد الفجر مثلًا بتبقى الدنيا هادية جدًا وبيبقى في تركيز وبركة في الوقت.

٦-ضع جدول الامتحانات أمامك في مكان المذاكرة حتى لا يحدث (لخبطة) في موعد مادة وتذاكر غيرها مثلًا هيبقى ساعتها اليوم لذيذ أوي وإنت رايح تمتحن مادة مش مذاكرها خلي بالك.

٧-الثقة بالنفس وقت الإجابة ولا للتردد (طالما إنك مذاكر كويس).

٨-روح ذاكر وبلاش قاعدة على النت كتير الامتحانات قربت :).

يمكن ده تكون آخر مدونة ليا (الأعمار بيد الله يا عم خالد) منا واخد بالي بس هيكون صعب أكتب تاني في الفترة اللي جاية لأن امحاناتي قربت جدًا ودعواتكم بقا لأن ده آخر سنة ليا في الجامعة إن شاء الله.

نسيت أقول حاجة مهمة جدًا يا جماعة وهي بركة دعاء الوالدين وطبعًا كلنا ماشيين بيها اوعى تخلي والدتك والا والدك زعلانين منك الأيام ده يدعوا عليك دعوة والا حاجة قول على نفسك ساعتها يالا السلامة وربنا يسلم ساعتها.

أتمنى بإذن الله أراكم على خير والكل قد أدى في الامتحانات بشكل ممتاز وجبنا تقديرات ممتاز وجيد جيدًا وجيد ومقبول و..... لا بلاش اللي بعد مقبول ده.

يالا السلام عليكم ورحمة الله وبركاته ومتنسوش دعواتكم للطلبة جميعًا.